लवकाष्ठाः कलाश्चैव मुहुर्त्तान्संधिरात्र्यहान्
स्थानाभिमानिनश्चैव स्थानानिच पृथक्पृथक्
कृतं त्रेता द्वापरं च तिष्यं चैव तथा युगम्
प्रागुक्ताश्च मया तुभ्यं पूर्व्वे कल्पे प्रजास्तु ताः
अप्राप्तायास्तपोलोकं पृथिव्यां याः समासत
वीक्ष्यार्थं ताः स्थितास्तत्र पुनः सर्गस्य कारणात्
धर्म्मार्थ काममोक्षाणामिह ताः साधिताः स्मृताः
ततस्ते तपसा युक्ताः स्थानान्यापूरयन्पुरा
आसंगद्वेषयुक्तेन कर्मणा ते दिवं गताः
स्वकर्म्मफलशेषेण ख्याताश्चैव तदात्मकाः
अप्सु यः कारणं तेषां बोधयन्कर्म्मणा तु सः
गृह्णन्ति ते शरीराणि नानारूपाणि योनिषु
तेषां मेध्यानि कर्म्माणि प्रायशः प्रतिपेदिरे
पुनः पुनस्ते कल्पेषु जायन्ते नामरूपेणः
ताः प्रजा ध्यायतस्तस्य सत्याभिध्यायिनस्तदा
जनास्ते ह्युपपद्यन्ते सत्त्वोद्रिक्ताः सुतेजसः
ते सर्वे रजसोद्रिक्ताः शुष्मिणश्चाप्यमर्षिणः
रजस्तमोभ्यासुद्धिक्ता गृहशीलास्ततः स्मृताः
कूटकाकूटकाश्चैव उत्पद्यंते मुमूर्षुणाम्
ततः प्रभृति कल्पे ऽस्मिन्मैथुनानां च संभवः
शब्दादिविषयः शुद्धः प्रत्येकं पञ्चलक्षणम्
तथान्वयास्तु संभूता यैरिदं पूरितं जगत्
तदा ता ह्यल्पसंतोषायुद्धे तस्मिंश्चरंति वै
ताः प्रजाः कामचारिण्यो मानसीं सिद्धिमिच्छतः
धर्माधर्मौं तदा न स्तः कल्पादौ प्रथमे युगे
चत्वारि तु सहस्राणि वर्षाणां दिव्यसंख्यया
ततः सहस्रशस्तास्तु प्रजासु प्रथितास्विह
पर्वतोदधिवासिन्यो ह्यनिकेताश्रयास्तु ताः
ताश्शश्वत् कामचरिण्यो नित्यं मुदितमानसाः
नोद्विजा नोत्कटाश्चैव धर्मस्य प्रक्रिया तु सा