पातुकामः समुद्रं च अगस्त्य ऋषिसत्तमः। एष लोकहितार्थाय पिबामि वरुणालयम्
भवतां यदनुष्ठेयं तच्छीघ्रं संविधीयताम्। एतावदुक्त्वा वचनं मैत्रावरुणिरग्रतः
समुद्रमपिबत्क्रुद्धस्सर्वलोकस्य पश्यतः। पीयमानं समुद्रं तु दृष्ट्वा देवाः सवासवाः
विस्मयं परमं जग्मुस्स्तुतिभिश्चाप्यपूजयन्। त्वं नस्त्राता विधाता च लोकानां लोकभावनः। त्वत्प्रसादात्समुत्सेधमुपगच्छेत्समं जगत्
संपूज्यमानस्त्रिदशैर्महात्मा गंधर्वमुख्येषु नदत्सु चैव। दिव्यैश्च पुष्पैरवकीर्यमाणो महार्णवं निःसलिलं चकार
दृष्ट्वा कृतं निःसलिलं महार्णवं सुराः समस्ताः परमप्रहृष्टाः। प्रगृह्य दिव्यानि वरायुधानि तान्दानवान्जघ्नुरदीनसत्त्वाः
ते वध्यमानास्त्रिदशैर्महात्मभिर्महाबलैर्वेगयुतैर्नदद्भिः। न सेहिरे वेगवतां महात्मनां वेगं तदा धारयितुं दिवौकसाम्
ते वध्यमानास्त्रिदशैर्दानवा भीमनिःस्वनाः। चक्रुः सुतुमुलं युद्धं मुहूर्त्तमिव भारत
ते पूर्वं तपसा दग्धा मुनिभिर्भावितात्मभिः। यतमानाः परं शक्त्या त्रिदशैर्विनिषूदिताः
ते हेमनिष्काभरणाः कुंडलांगदधारिणः। निहता बह्वशोभंत पुष्पिता इव किंशुकाः
हतशिष्टास्ततः केचित्कालेयदनुजोत्तमाः। विदार्य वसुधां देवीं पातालतलमाश्रिताः
निहतान्दानवान्दृष्ट्वा त्रिदशा मुनिपुंगवम्। तुष्टुवुर्विविधैर्वाक्यैरिदं चैवाब्रुवन्वचः
त्वत्प्रसादान्महाभाग लोकैः प्राप्तं महत्सुखम्। त्वत्तेजसा च निहताः कालेया भीमविक्रमाः
पूरयस्व महाविप्र समुद्रं लोकभावनम्। यत्त्वया सलिलं पीतं तदस्मिन्पुनरुत्सृज
एवमुक्तः प्रत्युवाच भगवान्मुनिपुंगवः। जीर्णं तद्धि मया तोयमुपायोन्यः प्रचिंत्यताम्
पूरणार्थं समुद्रस्य भवद्भिर्यत्नमास्थितैः। एवं श्रुत्वा तु वचनं महर्षेर्भावितात्मनः
विस्मिताश्च विषण्णाश्च बभूवुः सहितास्सुराः। परस्परमनुज्ञाप्य प्रणम्य मुनिपुंगवम्
प्रजाः सर्वा महाराज विप्रा जग्मुर्यथागतम्। त्रिदशा विष्णुना सार्द्धमनुजग्मुः पितामहम्
पूरणार्थं समुद्रस्य मंत्रयंतः परस्परम्। ऊचुः प्रांजलयः सर्वे सागरस्य हि पूरणम्
तानुवाच समेतांस्तु ब्रह्मा लोकपितामहः। गच्छध्वं विबुधास्सर्वे यथाकामं यथेप्सितम्
महता कालयोगेन प्रकृतिं यास्यतेऽर्णवः। ज्ञातींस्तु कारणं कृत्वा महाराजो भगीरथः
गंगौघेन समुद्रं च पुनः संपूरयिष्यति। एवं ते ब्रह्मणा देवाः प्रेषिता ऋषिसत्तमाः
उवाच भगवांस्तुष्टस्त्वगस्त्यमृषिसत्तमम्। देवकार्यं तु भवता दानवानां विनाशनम्
यतस्संतारिता देवास्तेन तुष्टोस्मि वै मुने। अभिप्रेतो वरो यस्ते याचयस्व ददामि तम्
एवमुक्तस्तदागस्त्यः प्रणिपातपुरःसरम्। इहस्थेन मया देव देवकार्यमिदं कृतम्
सर्वाश्रमाणां प्रवरो भवत्वेष ममाश्रमः। त्वया चोक्तस्तु भगवन्भविता नात्र संशयः
ब्रह्मोवाच। यात्रां तु पुष्करे कृत्वा इहागत्य नरास्तु ये। इह कुंडेषु ये स्नानं तर्पणं पितृदेवयोः
अर्चनं चैव देवेषु सर्वमक्षयकारकम्। अर्घ्यं चोच्चावचं गृह्य शष्कुलापूपकांस्ततः
दास्यंति द्विजमुख्येभ्यस्तेषां वासस्त्रिविष्टपे। श्राद्धेन पितरस्तृप्ता यावदाभूतसंप्लवम्
कंदमूलफलैर्वापि तर्पयिष्यति यो मुनिम्। सप्तर्षिस्थानमासाद्य मोदते शास्वतीः समाः